صور لـ / عـروس الشمـال !!

خالد العبدالله · 21-02-10, 10:51 PM

السلام عليكم

اخواني ..

صور متنوعه تسكن جهازي منذ حوالي الشهر وشوي
التقطتها في زيارتي الأخيره ( اللي قبل هذي )
ماحمسني لتنزيلها هنا إلا أني اليوم مررت على بعض هذيك الأماكن اللي جيتها .. ولقيت العشب فيها صاير أكبر .. كأنه ينتظرني !!

لكم صور من حائل .. لهذه السنه 2010
لكن رجاءا" .. لا أريد أي تعليق حتى انتهي من إنزال كل الصور

خ.ألـد

خالد العبدالله · 21-02-10, 10:58 PM

السلام عليكم

وبما أننا في الموضوع السابق كنا زرنا نقبين ..
فلتكن هي بداية الإنطلاق للجمال الحائلي ..
هذي صور لـ ( حركه ) مسوينها الشيبان

شجر ملتف على بعضه .. وكملوا بعض الزوايا لين صار المنظر وكأنك في بيت أشباح !

إقتربنا أكثر ..

ترى .. ما الذي في الداخل !!

وجـار <---- اللي يشبون فيه النار
يعني مسوينه حق قعدة عصر .. شاهي وقهوه وسوالف

اللي يبي يجلس .. يجيب معه الـ ( عزبه ) حقت الشاهي و القهوه .. ويبسط بها هنا

خ.ألـد

خالد العبدالله · 21-02-10, 11:07 PM

السلام عليكم

ألحين جاء دور ( مشـار )
نفس نطق ( منشار ) لكن بدون نـون !

هذا من أشهر المعالم في حائل ..
فيه مدينه ترفيهيه ( رغم قدمها ) ..
فيه مخيمات للإيجار .. تحت مسمى ( اجا بارك )

في النهايه يكون ( الشعيب ) .. اللي أنا مصور فيه

طلعت انا و أهلي .. وشبينا النار .. شاهي وقهوه
وخبزه ( جمريه )

طلعت الضلع ( الجبل ) .. ولقيت هالذكريات

تتوقعون اللي كتبتها .. ممكن تكون معنا بالمنتدى !!

<--- يا وسع خيالهم الطوال

::

بصعود ( الضلع ) طلعوا معي اثنين .. كانوا معي بالتصوير

تبون تشوفونهم !!

اللي يسار .. سالم ولد أخوي
والثاني .. فيصل أخوي <---- شبيه الريح
كح كح

مسوين إنهم كشخه هم وحركة اليدين على الجنب
هههههههههههههههههههههههههههههههه

×

صورت الـ ( شعيب ) من فوق الضلع
صورتين وحده يمين ووحده يسار .. سبحان الله كأنها نسخه كربونيه لبعضها !!

و

خ.ألـد

خالد العبدالله · 21-02-10, 11:14 PM

السلام عليكم

لا زلنا في مشـار ..
ألحين مبتلش شلون أنزل من الـ / جبل !!

هذا طريق الرجعه لـ / تحت

لو تلاحظون بين كلمة خالد العبدالله بالإنجليزي .. وبين 2010
فيه سيارتين .. هناك مكان القعده حقت أهلي

منهو رئيس الطلعه .. وأميرها .. وكل شي فيها !!

هذا سليمان العبدالله .. عليه السلام
ومعه سالم ( حفيده ) و فيصل ( ولده )

هذا من أحسن اللي يضبطون خبزة النار ( الجمريه )

هذي عجينه تعجن .. وتسوى بالجمر

شفتوا الرماد .. كانت الجمريه هذي داخله
وطلعت كذا .. السر وين !
السر عند أبو فهد الله يغفر له ويخليه

والله ياطعمها مجنووووووووووووووون ..
خاصة إذا كان ملحها زايد شوووووي
مع كاسة الشاهي .. تخش جو غصب

خ.ألـد

خالد العبدالله · 21-02-10, 11:21 PM

السلام عليكم

تعرفون ( حاتم الطائي ) !!

أكرم العرب ..

هذا منبعه حائل .. ومات هناك .. ولذلك سمي أحد الأنديه بحائل بنادي الطائي
ولا يزال الجبل الذي كان حاتم يشعل فيه النار ليراها المسافر فيمر عليه
لازال ذلك الجبل شامخا" في أطراف حائل ويسمى ( السمراء )
نظرا" لـ ( لونه الغامق )

/

تركنا ( مشار ) وسأتوجه معكم لـ ( توارن )
ولمن أراد معرفة نطقها فليقرأها بالإنجليزيه في الصوره التاليه

وهذا هو قبر حاتم .. المقبره مجاوره لـ / قصره وبيته

القبر طويل جدا" .. وأظنه تعرض لبعض الزيادات
لأن ولد حاتم ( زيد ) كان صحابيا" مع الرسول عليه الصلاة والسلام
ولم يكن البشر طوالا" لتلك الدرجه في ذلك الزمن !
قلت أني ( أظن ) ولست متأكدا" !!

::

هنا بقايا قصره وبيته ..

هل كان يتخيل أن هناك من سيرى قصره .. وبيته
دون أن يتواجد في توارن !!

خ.ألـد

خالد العبدالله · 21-02-10, 11:24 PM

السلام عليكم

بعد القصر .. والقبر

أكملت المشوار متسللا" لأعماق توارن ..
قرية لاتزال عامرة بأهلها
تبعد عن حائل حوالي 40 كيلو مترا" إلى الشمال

مررت بـ ( سد توارن ) ..

وهنا من زاوية أخرى .. كأن ذلك السد .. أصبح واحة غنـّاء !!

خ.ألـد

خالد العبدالله · 21-02-10, 11:32 PM

السلام عليكم

تجاوزت السد .. فوجدت أرضا" خصبه
قد بدأت للتو بـ ( التمخطر )
هذا كان قبل حوالي شهر ونصف من الآن

و

كانت هذه الصور هي نهاية المطاف ..
أو نهاية القريه بشكل أدق
عدت بعدها أدراجي .. مرورا" بالـ ( سد )

::

وفي كل زاوية ماء .. قلوب تعشق الجمال

خ.ألـد

خالد العبدالله · 21-02-10, 11:39 PM

السلام عليكم

آآآممممممممممممم

أين صاحبه الآن !!

هل كان يتخيل يوما" ما .. بأن هناك من سيتساءل أين هو !!

هل كان يستحق منا أن نتذكره !!

::

اللي يبي يعرف الجمال على حقيقته .. يرفع يده

هنا الجمال ..

وهنا

يااااارب .. لا تحرمنا الجنـّه

خ.الـد

خالد العبدالله · 21-02-10, 11:43 PM

السلام عليكم

ما أحد تساءل منكم وش سر الجرايد اللي حاطها ببعض الصور .. !!

هذي فكره أظن إن القرار هو اللي علمني عليها
( إن ماخاب ظني )

هذي عشان تأكيد للتواريخ المذكوره ..
وعشان تتأكدون إن الصور صدق قبل شهر ونص تقريبا"
شوفوا الجريده ..

ولتقريب التاريخ

السبت 23 محرم 1431
9 يناير 2010

ارجعوا للصور ألحين وشوفوا هي نفس الجريده وإلا لا

<<---- يبي يكرفكم خخخخخخخ

::

الصور اللي راحت .. هذي قبل شهر ونص تقريبا"
لكن الصور اللي صورتها اليوم ( الأحد )
هي اللي فعلا" حمستني انزل هالموضوع لكم

رحت لـ ( توارن ) .. وشفت تطورات بالأرض عجيبه
صحيح إن الماء قل .. والسد تقريبا" نشف
لكن الأرض اخضرت ..
وصارت مجنونه

خ.ألـد

خالد العبدالله · 21-02-10, 11:49 PM

السلام عليكم

فيه ناس مشككين بـ ( طولي )

طيب

تذكرون أفلام الكرتون ( صاحب الظل الطويل )
ماتحسون إنه انا !!

:p

هذا عند قبر حاتم اليوم العصر ..

والصوره الجايه للتوثيق
<<---- يسمع بتوثيق الصور ههههههههههههههههههههههه

،

ألحين عاد جاء وقت الربيع .. والمناظر الحلوه

مع الصوره اللي فوق .. والصوره اللي تحت
ماتتذكرون دعاية ( جبنة بـوك ) !!

خ.ألـد

الذين يشاهدون محتوى الموضوع الآن : 1 ( الأعضاء 0 والزوار 1)

(عرض الكل) الاعضاء اللذين قامو بقراءة الموضوع : 13
متاهة الأحزان, مشاعر انثى, مــنــــــآل, اللميـــاء, الصوت المسموع, النيــــزك, الكنز, توته, خالد العبدالله, حسين الشمري, عبدالله الكثيري, عبدالرحمن منصور, نايف الشمري