رونق~
الطيب وابن الأصول في هالزمن بقولون عنه ملقوف ..؟؟
انتِ سويتي بأصلك وماقصرتي ولا عليك لوم ولا اعتبر اللي سويتيه لقافه
بالعكس اللي سويتيه شهامة واصول وجزاك الله كل خير على نيتك الطيبه
لان الجار للجار .. ولكن للاسف هذا الرجال نفسه خايسه وشكاك يشك في نفسه
يعني سبحان الله
ما اقول الا الله يستر على بناتنا من كذا رجاجيل
ابحكي لك ذا القصه عمرها اكثر من تسع سنين, مرة في صبحية توها ماجت الساعة سبع
وانا ساكن بشقة في جده .. وكنت وقتها لحالي عيالي في المدارس وزوجتي في المستشفى
وابطلع للدوام الا وجرس الشقة يدق وافتحه الا وهي وحده وتصيح وتقول عند الله ثم عندك دخلني لام العيال قبل لا يذبحني هالمجنون انا شعر راسي وقف من الخوف ولا عندي احد في البيت واقلها انا ماعندي حريم يااخيتي لكن وين شقتكم وانا بتفاهم مع بعلك ..؟؟ما امداني اقول ذا الكلمه الا وابو الشباب جاي من اخر السيب يسخط ويلعن
وهذي المخلوقة من شافته من الخوف ادخلت الشقه عندي ساعتها انا طلعت من الشقه ومسكت الرجال
قلت اذكر الله وهدي اعصابك والعن ابليس واخذته وقلت له يابن الخلال لا تخلي الشيطان يدخل بيتكم
ومن هالكلام اللي يخليه يهدى شوي واخذته من ايده ورحت شقتهم وحلفت عليه ما يطلع الين يهدي
انا قدرت اهديه والين قلبه بالرغم اني ما عرفت وش اللي بينهم وش اللي يخلي رجال يسوي زي كذا بحرمته
حظى اني دايم اشوفه ويشوفني ويشوف بزراني يوم يلعبون في الاسياب وارد عليه دايم السلام
ايوااااااااه
انا الحين في ذا البلشه وش اسوي لو عرف ذا النشبه ان ماعندي حريم في البيت اكيد بيذبحني ويذبحها
المهم بعد ما اخذت منه يمين مغلظ انه ما يظربها ولا يمد يده عليها الا بوجود واحد من اخوانها او اقاربها
وعدته اني اناديها له ولكن بعد يجي واحد من اخوانها وفعلاً دق هو على ابو البنيه وجا ابوها في ربع ساعه
خلال هالفترة احس ان قلبي بيوقف من الخوف وش اسوي لو درى انها بلحالها عندي في الشقه ولابه حريم
المهم جا ابوها وش السالفه وش القصه الرجال سكت وحسيت من نظرته انه ما يبيني اسمع وانا وقتها يوم شفت ابوها
استئذنتهم وقلت لبوها انا بزهم على عيالك وانتوا حلوا اموركم باتلتفاهم ... خرجت من عندهم وانا اقسم بلله اتنافظ من الخوف وش اسوي مع ذا المخلوقه .. المهم دقيت جرس بيتنا وتنحنحت وفتحت الباب الا وذا المخلوقه تقول صبة اسمنت من الخوف ولا حركه ولا نفس .. قلت اسمعيني يابنت الناس ابوك موجود ولا تركت بعلك الين زهم عليه
وجا "انا الى هنا كثر خيري" وانتي على شان لا تزيدين الطين بله اخرجي وانا بجي بعدك لا كن احذريني واحذرك انهم يدرون ان ماعندي حريم في الشقه .. يشهد الله ان المخلوقه ماقالت الا ابشر وبيض الله وجهك وطلعت من عندي
وراحت شقتهم انا هنا تنفست الصعداء وحمدت ربيي ان جاب العواقب على ما تمنيت
طيب الحين انا تصرفت غلط ولا صح ..؟؟
ان تركتها بيذبحها ويهينها في الشارع
وان طعتها جبت لنفسي مصيبه انا في غنا عنها ..؟؟
هل تصرفي كان صحيح بالرغم انه غصب عني
وهل سكوتي كان فيه حكمه خلا الرجال يعتقد ان الحرمة عند حرمتي
ما ادري قولولي انتم
ولكن لان الله عالم بالنيات سلمنى وسلم ذا المخلوقه اللي الله يستر عليها وين ماتروح
رونق ~
احياناً تجربنا شهامتنا على السقوط في مواقف باتت في زمننا هذا عيبه
بالرغم ان تصرفاتنا كانت في قمة الشهامه ..؟؟
كفو والله ياام دحيم