والله لو كان المقدر على الكيف
ما غبت يا نايف ولا احنا ضمينا
الموت يا نايف كتاب وتصاريف
وحنا بحكم اللي خلقنا رضينا
العام يا أم سعود كان الجزن ضيف
واليوم دق اوتاده الحزن فينا
الحزن غيمه غيبت نجمة الصيف
وبأسباب جوره يا جواهر شكينا
غاب الحبيب ولا بقى للهنا ضيف
والآه يا نوره تهاوت علينا
كن الظهر يا سعود فيه انغمد سيف
والصدر صار لكل الأوجاع مينا
أقول يا محمد متى فارق وكيف
وأصيح يا ساره متى هو بيجينا
يا نوف من عقبه ترا بسمتي زيف
جف الفرح من حولنا وانطفينا
ابوك يا نواف ماله تواصيف
وانشد مشاعل كان مثله لقينا
والكون يا هيفاء بلا ظله مخيف
واعذر بكانا يا فهد لو بكينا
كان القمر كان البحر والمجاديف
كان الحنان اللي بحظنه دفينا
وكان الملاذ لشاكي الضيم والحيف
كم شال عنا كم خذا عن يدينا
عاش ورحل كله مهابه وتشريف
جار الحرم فوق الحكي وان حكينا
كل ما رخيت الجفن جدت عواصيف
والشوق ثار وفارقتني السكينه
وشفتك مثل شمس بروس المشاريف
نورك يناديني وان اقول وينه
والقاك واصحى والمحك راقي النيف
حي ولو صلت عليك المدينه
احسك بجوفي ماهي تخاريف
يا ساكن عيون المها الحزينه
في ذا جلسنا بين صمت وسواليف
وفي ذا الممر اثنيننا كم مشينا
وفي هالزوايا كم جمعنا موانيف
وياما على ذيك المرايا ضوينا
عشرة عمر ما تنتهي بالصواديف
وذكرى تميت احيا ولو ما بقينا
^ هذي كلمات أغنيه للفنان محمد عبده و بألحانه
سمعتها وأبيت إللا أن أشارككم بكلماتها
اللحن أضاف عليها من الحزن ما يدمع العين
والكلمات تصيب قارئها بالكئآبه من شدة الحزن فيها
كلمات الأميره مها بنت محمد الأحمد السديري
زوجة الأمير نايف بن عبد العزيز رحمه الله وتلقب بـ ( غيوض )
# تقبلو منقولي ...