مساؤكم طهر ونقاء كالتوت أيها الأحبه ، لحين إعلان من سيعتقل هنا
من قبل التوت ، دعوني أخبركم بما وعدت به توته وهو بمثابة هدية مني لها
هو موقف بسيط لا يستحق أن يكون بمثابة هدية ، ولكن لأن توته سبب
فيه ، وصادف فترة إعتقالها هنا وما حصل لها وكلكم تعلمونه حبيت أرفع
من معنوياتها <<< بعد أيش :p
توته تدرين ليه إنتي سبب بالموقف لأني من خلال متصفحك الخير نقش في
قلوب الخيرين نزلتي مقاطع وأنا عندي بالسياره جهاز لتحميل المحاضرات
أستمع لها خلال سفراتي وما أكثرها فاللي عندي سمعتها كلها وحفظتها
وكل يوم أقول أبي أحمل وسبحان الله وجدت ما أبحث عنه يوم نزلتيها
حقات جوال الخير مقاطع كثيره وجميلة جعلها الله في موازين حسناتك
المهم <<< وش عنده أبـو الشباب أقول أخلص علينا وش الموقف
هذا ياجماعة الربع يوم جيت من الحفر يوم الإربعاء بعد ما عطيت الحصتين
اللي علي << مضبط الربوع الاولى والثانيه بس << أقهر توته والله من
التعقيد عندكم يالحريم
وأنا بالطريق يوم بقى على حائل حول مية كيلو كان فيه عمال يأشرون
والوقت الظهر وحر قلت آخذهم أكسبهم أجر يوم وقفت هم إثنين قال
واحد حايل صديق قلت مافيه مشكل <<< الولد مو هين معاه لغه هههه
قال الباكستاني هم باكستانيه كم فلوس صديق قلت لا لا يا صديق ما يبغى
فلوس <<< وش رايكم بلبل بلغة العمال ، قال مشكور قلت أركب وخل
الثاني ورى قال لا ياصديق بس نفر واحد يروح سوا سوا إنتا ، ركب الثاني
معي وسلم على خويه منو ركب معي الثاني مو الأول ، المهم أنا كنت بالطريق طول الطريق أتسمع للمحاظرات اللي نقلتها من اللي نزلتها توته
وكنت مندمج كلها حلوه وفيها عبر وفوائد كثير ، عاد قبل ما أركب
الباكستاني سبحان الله كنت أسمع مقطع عن باكستاني طمر على بيت الشيخ
عبدالعزيز بن باز الله يرحمه ويوم مسكوه وودوه للشيخ عطاه أكل وسأله ليش يسوي كذا قال أن أبوه مريض وباقي عليه خمس آلاف ريال من العشره حقت العمليه قامك الشيخ وتأكد من المكاتب الخيريه هناك عن قصة أبو هالسروق ، طلعت صحيح قام الشيخ عطاه خمسه للعمليه وخمسه ثانيه له يعني عشر آلاف ، والباكستاني صار من طلبة الشيخ ويوم توفى الشيخ تأثر القصة طويله ....... وعلى ما خلص المقطع إلا هذولا يأشرون ويوم ركب معي الباكستاني كنت متحمس قلت له يا صديق أنا الحين يسمع قصه كذا كذا وسردت عليه السالفه (ودي الكل يحبنا وودي أنقل صوره زينه عننا للعماله عشان أحببهم فينا ) وهو يقول أها ها أي المهم حروف متقطعه ، بعدين سكت وسكت هو قلت له ياصديق أنت شغل وين حايل ولا فيه قريه سكت
قلت صديق أنتا فين شغل وطولت صوتي ولمسته بيدي قال صديق أنا مافيه معلوم كلام عربي عاد أنا الحين بهاللحظه دورني ههههههه إنقهرت من سردي
للقصه هههههه لكن عادي ، وبصعوبه فهمت منه أنه ناوي يروح عمره يبي
النقل الجماعي بحائل ، قلت صديق سوي دعا طبعاً بالتمثيل شرحت له :D .
وتوته ياتوته وخلصت الحتوته .
الشاهد من هالقصة وهديتي لك ياتوته هي أني وغيري إن شاء الله
ممن حملوا أو سمعوا تلك المقاطع سيكون لك بسببنا إن شاء الله
أجر ، فجزاك الله خيراً ... تعبت خلاص أبي أوقف
توته لا تدققين والله ماني فاضي ومالي خلق أدقق على اللي كتبته
صايرة لي سيبويه مدري مدري أبو الأسود الدؤلي .
[glint]
يلا منهو اللي بعدك نبي نستلمه :eek: .
[/glint]