بسم الله الرحمن الرحيم
السلام عليكم ورحمة الله وبركاته
بالبداية احب اقولكم اني ما احب اتكلم باللغة الفصحى لسببين وهم:
السبب الاول عشان اذا عبرت باللغة الفصحى يمكن احوس الدنيا ولا راح اوصل الفكره اللي براسي بالشكل اللي انا ابيه..
السبب الثاني ما احب اتصنع طبيعة غير طبيعتي اللي تربيت عليها ..
وسؤالي هذا ما جاء من فراغ جاء من حوار صار بيني وبين شخص معاي بنفس الدوام...
في يوم من الايام كنت جالس بالدوام افكر وكنت متضايق وجاني شخص عزيز علي وقالي وش فيك تفكر ومتضايق قلت جالس اتخيل اني بين اهلي وناسي قال الله يعينك قلت إي والله الله يعين على الغربة..قام يضحك علي وقال اي غربة اي بطيخ يا عمي الغربة اللي باوربا وامريكا اللاتينيه والدول هذي ام انت جالس هنا وديرتك تبعد يمكن 1000 كيلو متر وجاي تقولي غربة..؟ سكت شوي ورديت ليه وقلت الغربة غربة (أهل) مو غربة وطن..قالي كيف يعني قلت..تخيل تمرض ولا فيه احد يخاف عليك ويسئل عنك ..تخيل كل يوم تاكل من المطعم فطور غداء عشاء قمة الملل..تخيل كل يوم تطلع من الدوام تجي البيت ما تلقى احد يستقبلك مثل ابوك ,امك,اخوانك ..تخيل انت في ديره مافيها لك لا عم ولا خال ولا حتى عمه او خاله ...تخيل تروح للسوق من غير امك و خواتك..تخيل مافيه احد يخاف عليك اذا تاخرت بالليل.
وبعد ما انهيت كلامي معاه سكت شوي وقالي.. بصراحه توني عرفت معنى الغربة .
سؤالي لكم ويهمني اسمع رايكم
هل الغربة... غربة (أهل) إم غربة وطن...؟