|
أيـآم زمـآنـ+خنـابـيـق زمـانـ ..!
أيـــام زمان كان كل شيء طبيعي وكل شيء يسير على سجيته هناك عفوية ..بساطـة .. براءة بتفكيرهم وتربيتهم وطريقة معيشتهم النخل .. السدر .. الجلوس على الدّكّة بالحارات وبين المنازل أصوات الراديو التي تسمع من خلالها أغنيات خالية من الصخب والضجيج والنوم بأروقة السطوح في هواء مشبع بالبساطة الأكثر من رائعة يالله .. أيــــــام جميلة جميلة جميلة جدا ً وليتها تعود أثنــــاء النوم بالسطوح تنطلق من أفواههم حكايات مرسومة من وحي الخيال لا أعلم من الذي آتاهم بها ومن أين لهم تلك الأقـاويل .. بعض تلك الحكايات تكون بمثابة افكار لاصحة لها مثلاً .. ( لاتعد النجوم يطلع بوجهك ثالول ) وبعدما نتناول وجبة الغداء ..يخلد الكبار بالسن إلى غرفهم لأخذ قسط من القيلولة وقبل خلودهم للنوم يقولون لنـا ..( لاتطلعون تلعبون بالسكة تجيكم أم السعف والليف ) كما أنا هناك قصص يقصونها لنــــــــا أثنـــــاء النـــوم طبعا ً أنــــا لا أتـذكر أن أمي هي من تقص علينا هذه القصص بل جدتي لـ أمي وجدتي لـ أبي هم من يقصون علينــــا حكاياتهم الخرافية الأكثر من رائعة التي تجعلنا منسجمين معها لأبعد مدى من الإنسجـــام / \ الإحبة الكرام .. هنـــا مساحـة شاسعة لنتحدث عن أيام زمان وعن أشهر الحكايات والأقاويل التي كنا نسمعها من أجدادنا لكم الحرية بإختيار ماترغبون بالتحدث عنه بأيام زمان وعن أعياد زمان و اعراس زمان و( خنابيق زمان ) وبالأسلوب والطريقة التي ترغبون بها وما أكثر ما يعجبك بأيام زمان ..؟؟ وماهي الحكاية الشهيرة التي سمعتها بذاك الزمان ولازالت تعلق بذاكرتك ..؟؟؟؟؟!!!!! |
من أشهر القصص اللي كنت أحب أسمعها هي قصة أسمها ( عـــرّوي ) كنت أسمعها من جدتي أم أمــــي ..كنت دائما لما انام في بيت خوالي اطلبها من جدتي تقصها لنا ( مايطلبه الزائرون ) يالله .. وربي ما أنسى نبرة صوتها وهي تحكيها لنا فديتها وفديت صوتها راح أكتب القصة لكم بنفس ماسمعتها من جدتي ولا راح أغير من كلماتها فيه بنت أسمها عرّوي يسمونها عروي لأنها عريا ( يعني عرجا ) طلعت عروي الضحى مع أختها فهيمة يلعبون بالبستان صار وقت الغدا وجتهم دجاجة البيت تناديهم .. عروي فهيمة ..عروي فهيمة تقول امكم يالله تعالوا للبيت لاتجيكم ام السعف والليف تاكلكم فهيمة بنت عاقلة تسمع كلام امها ..نادت اختها عروي ..عروي يالله قوه للبيت قالت عروي ماني ..ماني رايحة للبيت .. قالت لها بنادي الكلب يعضك .. قالت روحي نادي الكلب راحت فهيمة للكلب ..قالت له ياكلب قوم عض عروي على شان تروح معي للبيت قبل لاتجينا ام السعف والليف .. قال لها الكلب ماني رايح اعض عروي .. قالت له ترى بنادي لك الراعي يضربك بعصاته قال لها روحي نادي الراعي .. وراحت فهيمة للراعي .. قالت له يالراعي قوم اضرب الكلب بعصاتك على شان يقوم يعض عروي على شان تروح معي للبيت قبل لاتجينا ام السعف والليف قال لها الراعي انا بتغدا وبنام ماني رايح اطق الكلب .. قالت له فهيمة ترى انادي لك الحلاق اخليه يحلق لحيتك .. قال لها روحي للحلاق راحت فهيمة للحلاق ..قالت له ياحلاق تعال حلق لحيــة الراعي على شان يجي يطق الكلب والكلب يعض اختي عروي وعروي تروح معي للبيت قبل لاتجينا أم السعف والليف تاكلنا قال لها الحلاق ماني رايح احلق لحية الراعي الشمس حارة هالحين قالت له ترى بنادي لك النار واخليها تشب في بيتك قال لها روحي للنار .. وراحت فهيمة للنار قالت لها ينار قومي احرقي بيت الحلاق على شان يجي يحلق لحية الراعي والراعي يجي يطق الكلب والكلب يجي يعض اختي عروي وعروي تجي معي للبيت قبل لاتجينا ام السعف والليف تاكلنا قالت لها قالت لها انا ما احب احرق بيوت الناس من غير سبب قالت لها ترى بنادي لك الماي يطفيك .. قالت لها روحي نادي الماي يطفيني وراحت فهيمة للماي قالت له يالماي تعال اهجم على النار وخوفها على شان تجي معي تحرق بيت الحلاق والحلاق يجي يحلق لحية الراعي والراعي يجي يضرب الكلب والكلب يجي يعض عروي اختي على شان تروح معاي للبيت قبل لاتجينا ام السعف والليف تاكلنا قال لها ماني رايح للنار .. قالت له ترى بنادي الحصان يخوض فيك قال لها روحي للحصان .. وتروح يم الحصان وقالت له ياحصان تعال خوض بالماي على شان يطفي النار والنار تروح تحرق بيت الحلاق والحلاق يروح يحلق لحية الراعي والراعي يجي يضرب الكلب والكلب يجي يعض اختي عروي على شان تروح معي للبيت قبل لاتجينا ام السعف والليف تاكلنا .. قال لها الحصان وخري عني لا توجعين راسي انا تغديت وبنام هالحين ... قالت له ترى بنادي الذبانة تدخل بخشمك قال لها روح نادي الذبانة .. وتروح فهيمة للذبانة قالت ياذبانه تعالي ادخلي بخشم الحصان على شان يخوض بالماي والماي يطفي النار والنار تحرق بيت الحلاق والحلاق يحلق لحية الراعي والراعي يجي يضرب الكلب والكلب يجي يعض اختي عروي وعروي تروح معي لبيتنا قبل لاتجينا ام السعف والليف تاكلنا .. قالت لها الذبانة ماعليه ادخل بخشم الحصان بس وينه انا ما اعرف الحصان .. قالت لها انا وديك عند الحصان وتقوم فهيمة وتاخذ الذبانة معها وتروح معها يم الحصان .. قالت لها هذا هو الحصان طيري بسرعة وادخلي بخشمه على شان يقوم ويخوض بالماي وتقوم الذبانة وتطير وتدخل بخشم الحصان ويقوم الحصان ويجي يطامر ويخوض بفهيمة وماتت فهيمة وعروي رايحة لبيتهم من زمان ومتغدية ونايمة على شان ماتكلها ام السعف والليف .. :qtrat (31)::qtrat (31)::qtrat (31)::qtrat (31): هههههههههههههههههههههههههههه وسلامتكم |
يالله حسن الخاتمة يارونق
الظاهر انك في عمر أمي (الله يحفظها ) لي عودة للموضوع . لكن في وقت أوسع من هذا لأسرد لكم بعض الذكريات الطفولية تحياتي لرونق ومواضيعها الرائعه |
اقتباس:
عموما أنا بإنتظار سردك لذكرياتك وحكاياتك الطفولية وربي يحييك والروعة تكتمل بكم ومعكم شكرا الصوت |
رونق شاكر لك هذا الموضوع لعدة أسباب منها
عودتنا لذلك الزمن الجميل ، وأيضاً لأني تعبت من غلا ما عندي إلا ثلاث قصص مليت وأنا أرددها لها على مدى سنوات لذي سيكون هذا المتصفح مرجع لي لأسرق منه ما يجود به الأحبه هنا من قصص زمان وما أجملها تربينا على تلك القصص والتي حتماً سأتواجد من خلال بعض منها ... من أكثر القصص هي قصة تريترا تلك الأسطوره الخياليه التي كنا نتجمع حول من يقصها لنا والتي سوف أسردها لكم ذات يوم وكذلك على طاري أم السعف والليف كانوا يخرعونا بحمارة القايله ، والكثير الكثير الذي سأعود له . رونق إحترامي وتقديري . |
رونق حلوه قصة عروى وتنفع لأنها طويله وتدوخ
وفيها مجال للتأليف ( أعجبني مفرده كلمة قوه ، عندنا هالكلمه منتشره ) |
اقتباس:
حمارة القايلة أعرفها أيضا ً كانت ( ترويعة ) أخترعها كبار السن لتخويف صغارهم بوقت القيلولة حتى لايخرجون يلعبون بالحارة لكن انــــا متشوقة جدا ً جدا ً لمعرفة حكاية تريترا وماتحمل تلك الحكاية من إبتسامة متوشحة بالإنسجام لمن يتلقاها .. أستنار المتصفح بوجود أخي حسين وننتظرك تعود راويا ً لحكاية تريترا ..! |
اقتباس:
بس تدوخ اللي يقصها وتنشف ريقة وتخليه يخنبق ويخربط بس اطفال هالزمن والله مايدوخهم شي الله يحفظهم تتعب وتنام قبلهم وهم ماشاء الله عليهم بآخر نشاط وكلمة قوووه كلمة متداولة عند أهل نجد عموما وتعني .. هيا ..مثلا قوه للبيت يعني هيا للبيت .. لك تحياتي ياحسين وشاكرة لك تعقيبك على عرووي .. |
رونق
والله زماااااان يا فن !!! ما اجمل ان تعود بنا الذكريات الى زمان الطفولة ونحن في اعمار الشبيبه وما اجمل الماضي رغم صعوباته وعفويته . لعلك استاذتي فتحي باب الحكايه مع الاجداد والاحفاد ولعل الماضي يندثر امام زخم التكلونجيا الحديثه والتي سيطرت على الماضي والحاضر تطرقت فينه من الوقت الى طرح عنوانه ( الاطفال بين حكايات الاجداد ومغريات العصر الحالي ) فبحث فيه وناقشت الموضوع من عدة جوانب ولكن وجد ان الحكايات لا تزال تترجم لطفل عبر قناوت اخر مثل التيقي او العاب الدفدي التي يعيش من يستخدمها الدور في الحكايه او اللعبة . رونق سلمت يداك اديبتنا على هذا الطرح الذي استمتعت به و بتفاعل الاعضاء فيه وطرح حكاياتهم وقصصهم الفريده .. دمتي بخير ولا حرمنا من تواجدك الوضاء .. |
رونق
ماشاء الله عليج غاليتي دوماً انتي رائعه بكل شي وجذبني الموضوع صراحه خاصه انه يتكلم ويفضفض عن ايام زمان بكل تفاصيله الجميله وخاصه سالفة القرقيعان اللي للحين احس بطعمه وطعم فلقات الراس اللي تفلقت روسنا وقت مايطّشون الحلاو علينا ... / / رونق شكراً لجمال موضوعك |
| الساعة الآن 12:47 PM. |
Powered by vBulletin® Version 3.8.9, Copyright ©2000 - 2024, Jelsoft Enterprises Ltd. TranZ By
Almuhajir
جميع الحقوق محفوظة لموقع قطرات أدبية 2009