{ كلمات معربّه}

[مشاعر انثى]

السكّه { المكان الضيق او الحي الضيق }

[مشاعر انثى]

ابغى اعرف وش معنى
مدروخ لأني شفتها هنا
منو اللي يعلمن 0

[الكنز]

/

مساكم الله بالخير ..جميعا"

/

ترمز :: ويعني مطارة الماي الكبيره اللي تحفظه بارد

/

البستوق :: وهو وعاء من الفخار ..يسوون فيه الطرشي ( المخلل)

/

بريمز :: وهو موقد يعمل على النفط الابيض( الكازولين)..ويستعملونه بالطبخ

/

بويه :: وهو طلاء الجدران ..ويكون من مادة النايلون يلمع يعني

/

صفرطاس .:: وهو القدور الصغيره اللتي تكون اربع أو خمس فوق بعض ..!!

/

المدعاب :: وهو مكان خروج الماء من البيت للسكه ..ودائما" يكون تحت الباب مباشره

/

الميرزاب :: وهو الماسوره التي ينزل منها ماء المطر ..من السطح
/

الدهليز :: وهو يكون في مدخل البيت على شكل ممر ..يؤدي لحرم البيت
/

الطارمه :: وهي داخل وسط البيت ..ومنها يكون مكان الغرف ..أي مثل المظله لمكان الغرف

/

الحوش :: وهو الحوي ..ويكون وسط البيت وبأضلعه الغرف

/

الطوفه :: وهي الجدار أو ..الحائط

/

الجاخور :: أو الياخور وهو الزريبه ..أو ..مكان تربية الحيوانات بالبيت

/

التنور .:: وهو أسطوانه من الطين الفخاري ..تستخدم بالخبز والشواء

/

البرنده :: وهو البلكون ..أو ..الشرفه في الغرفه من البيت

/

الجليب :: وهو الحفره التي يستخرج منها الماء للبيت والمزرعه

/

المس :: وهو الملعقه الكبيره التي تستخدم في أخراج الرز من أناءه

/

اللاله :: وهي أخت الفانوس ..ولكنها تكون فقط زجاج من الأعلى ..وليس فيها أطار مثل الفانوس

/

أذلف :: معناها أبتعد من هنا

/

أنجلع :: معناها ..بعد لو سمحت روح من هنا

/

وخر :: يعني أفسح المجال شوي

/

المشق :: وهو الوسخ المتراكم على اليدين والرجلين للأطفال وتكون طبقه سمراء ..وتتقرح بتشققات موجعه

/

كروه :: وهي تعني الأجره

/

جواريب :: وهي الدللاغات ..للقدمين

/

ولي عوده ..يامشاعر

تحياتي

[مشاعر انثى]

ياهلا اخوي الكنز
صراحه قوااااااااااميس ومصطلحات غاية الروعه
شاكره لك مرورك مجدداً

[مشاعر انثى]

شينكو الحديد اللي يحطونه مثل حاجز للبيت له عدة إستخدامات0
باشر يعني بكره
زحليقه نوع من انواع الالعاب حق التزحلق
الميزّ طاوله مثل التسريحه تبع الغرفه

الماصه طاوله حقة المدارس وغيرها { شخباري يامشاعر ههههههه }

وهناك المزيد والمزيد انتظرونا

[الصوت المسموع]

الطربال = الي يغطون به أكياس الشعير وزرايب الغنم (مثقف ) <<<

الطنجير = الخبل الدبه الي ما يفهم

دوبك = بشويش

[مشاعر انثى]

هلابك يالصووووووووووووووووووت
منور الصفحه
توني اتكلم فيك
شنو معنى مدروخ ؟
وشاكره لك0

[مشاعر انثى]

دوبك بشويش !!
اعتقد دوبك معناها { توني مثل اني اقول { توني جايه من العمل } يعني { دوبك جايه من العمل}
مدري انت هذا قصدك ؟أو الأخت غلطانه ؟

[الصوت المسموع]

المشاركة الأصلية كتبت بواسطة مشاعر انثى

هلابك يالصووووووووووووووووووت
منور الصفحه
توني اتكلم فيك
شنو معنى مدروخ ؟
وشاكره لك0

تتكلمين في مع من ؟!!

شكلكم طايحين فيني حش:rolleyes:

مدروخ يعني دايخ

بعدين دوبك أذا قلتها لشخص يعني هدي أو بشويش هذي في لهجتنا

وتجي على نفس المعنى الي ذكرتيها لكن نفهمها بأسلوب الكلام

[مشاعر انثى]

اسمع ياولد العم
لهجتنا ولهجتكم وحده { يمكن الكويت يختلف كلامهم ؟ مدري
بس مدروخ هذي توي اسمعها
صح تجي على صيغة دايخ { والله يامشاعر ماتدرين وين الله حاطك }