[الباهيه]

رجعنا بس ... رجعنا بعد غيبه كننا أغراب
محبتنا..معزتنا .. غدت أشياء وهميـــــه





حكمها ظرف هذا الوقت وقفل دونها ابواب
وصار الجرح و الدمعه حكايه ابلا أهميـــه




مجرد عاشقه و عاشق جمعهم بالبعاد اكتاب
على سطر الخصام إلى.. بدا من غير حنيه





شهور تمر و كل عاشق على ضلع الوله مسطاب
يداوي هالوله و الشوق ..ولا يقدر على كيّــه





تعيش بداخله رغبه تثور و تحرق الاعصاب
تحرك جلمد احساسه إليت تصير رسميه





لها نضج العظيم وحكمة العاقل على لذناب
لها روح الطهار إلي لها لمسات سحريه





تجول ذهاب ثم اياب وترجع تبتديها ذهاب
عسى بعض القلوب تلين مدام ان الارض حيه





تروي زهرها الميت وتحسبب للمحبه احساب
وتحضن طفلة الخافق قبل لتصير ممحيه





حبيبي ما خُلق ذاك الذي في غيبتك يغتاب
يسم القلب بقوالٍ تجينا حيل سطحيه





أحبك يكفي افهمها وفهم عاشقٍ منصاب
ثمان شهور متحمل سيوف الشوق لي فيه





تعوذ من شياطين البشر وقبل ولا ترتاب
كفاك اغرور ياجرحي فؤادي مل مابيه





وحس ان النفس ضاقت بعد ما ضاقت الاثواب
ومات الحظ و الرغبه وكل اللي سعى ليه





مغير الحب و ودادك غدو في غيبتك اصحاب
تظمهم لحظة اشواقي و ذكرى حب عفويه




حبيبي من الغلا باقي بوسط القلب لك اسراب
ولكن والله مظمنها مدامك تلوي ايديه





اقرب لك..تبعدني كأنك..ماخذنها اضراب
عن عيوني..وهمساتي..وحتى عن خطاويه





تغلا يا الغلا بكيفك ولكن ضمني بترحاب
ترى هالروح في حبك قسم بالله مبليه





تهاونت الألم لجلك وجيت بخافقٍ ماطاب
اشيل الحزن من قلبك و ضمه بين ضلعيه





وصلتك و الأمل بيني و بينه قبتٍ وحجاب
وبين الياس و قليبي دروبٍ حيل مطويه





امل حبك امل وصلك حبيبي قمت احسه غاب
ترى كثر الجفا يجعل قليبك فاقد اشهيه





وانا من يوم فرقانا هموم الوقت بي نواب
هذْا يحضر هذْاك ايغيب كأني جثه مرميه





على وهم الغرام إلى بدا فالأوله خلاب
إلين إنزاحت اطيافه و بانت لي خوافيه





صحارى البعد وش خلت بوسط الذاكره يصحاب
سوى سرب السراب المْيت وبعض اشياء وهميه





رساله لا تخــــليها تمر و تنــــدفن بتراب
ترى يمكن تكون آخر قصيده ولا لها خيه





ترى ياهي أليمه لو يصير الكبرياء (أرباب)
مبين العاشق وخله بوقت الضيق و الفيه..!!





ندم صافحة له يده سألني وما لقيت اجواب..!!
سألني سر هالدمعه وعن لومٍ نثر ضيــه





تلوم القلب ومضاته ندم واحلى حروف اعتاب
وانا وصمت نتشارك على وضع ( النداميه )





غزيت الفكر و الهاجس بدون مقدمه و خطاب
وصرت الغالي الأوحد و حبك ميه بالميه




انا اشرح لك ولا ودي احصد من الشعر اعجاب
انا ودي و كل ودي تعود..من الجفا ليــــه ...!!!